Yon lekòl tèt anba non yon peyi tèt anba

An 1963, nan komin Pòsali, direktris lekòl mè, direktè lekòl frè te dakò pou elèv yo aprann katechis an kreyòl, kwak se an franse sèlman pwofesè travay nan tout klas. Pou ki sa ? Se yon keksyon Iv Dejan poze tèt li pendan l ap reflechi sou pwoblèm lekòl an Ayiti. Repons li jwenn nan koute pawòl mas pèp la, nan etidye koze lang ak edikasyon fon, nan fouye liv, nan kou nan Inivèsite Ayiti a an 1965 ak 1966, epi nan Inivèsite Indyana o Zetazini kote li vin gen diplòm doktora nan lasyans lang an 1977, apre sa, nan kou li fè sou lang ak edikasyon pandan trèzan nan twa inivèsite vil Nouyòk epi Pòtoprens ant 1986 ak 1993, yo nan liv sa a.
Dapre pwofesè Dejan, sitiyasyon lekòl tèt anba kapab vire lòlòj anpil moun save an Ayiti. Èske se egzajere l ap egzajere, èske se depale l ap depale ?
Anpil lòt keksyon poze sou zafè konn li ak konprann epi konprann ak lang pou timoun aprann li.